Tragjedi në Libofshë të Fierit, ku një bombol gazi plagosi tre pjestarët e familjes Zaimi, të cilët ndohen në spital. Ngjarja ndodhi dje rreth orës 17.30 ku në shtëpinë e Muharrem Zaimit u dëgjua një shpërthim i fuqishëm. Pasojat vërtetë të tmerrshme. Tre familjarët, Muharremi me bashkëshorten Odeta dhe një djalë të paralizuar prej dhjetë vitesh, dergjen në spital. Ata po marrin mjekim intensive dhe mjekët japin shpresë se e kanë kaluar rrezikun për jetën, por jeta e çiftit të moshuar dhe djalit të paralizuar duket se është shuar nga flakët e tmerrshme…
Shtëpia është shkatërruar plotësisht, ndërsa në pamundësi të theksuar ekonomike, çifti bashkëshortor e ka të pamundur rindërtimin e shtëpisë. Muharremi është pensionist, ku më parë ka qenë mësues, madje i dekoruar, si “Mësues i merituar”, po sot ka zë vetëm për të bërë thirrje për ndihmë. Gjithçka kishte ndërtuar iu mor nga bombola e gazit, duke mbetur në qiell të hapur.
Ishin banorët e zonës ata të cilët nën pirgjet me inerte dhe objektet e banesës nxorrën çiftin e moshuar dhe djalin e tyre në karrige me rrota. Vetëm ndërhyrja e tyre në kohë i shpëtoi nga vdekja, por problemet e mëdha për ta janë në vijim.
Në Libofsh, pranë rrënojave të banesës gjenden ekspertët e policisë dhe të zjarrfikësve për të kryer ekspertizën, por familja Zaimit ka nevojën për praninë e pushtetit lokal, biznesmenëve dhe personave të tjerë që të mundësojnë ndihmën sa më shpejt të jetë e mundur.
Shtëpi mbi krye për atë jetë të mbetur të çiftit bashkëshortor që problemet nuk iu ndanë përjetë. Me djalin e paralizuar, të ardhurat mujore ishin vetëm për të mbijetuar dhe ai mësues që nga viti i largët 1964 kërkon ndihmë. Brezat e nxënësve të ka nxjerrë e kishte bërë një nga njerëzit më të respektuar të zonës, por fati i keq ishte me mësuesin që tashmë do i duhet të vuajë pasojat e humbjes së banesës që në pak sekonda ajo bombol gazi i “fali” jetën, por i mori gjithë mundin e një jete, shtëpinë.
