Manuel Almunia luajti për shtatë sezone me skuadrën e Arsenalit, dhe gjatë jetesës së tij në Londër ai ka zbuluar disa fenomene paranormale që i kanë ndodhur atij dhe bashkëshortes së tij.
42-vjeçari, i cili u tërhoq nga futbolli në vitin 2014, ka deklaruar se për disa kohë ka banuar në një ndërtesë që gjatë luftës së dytë botërore kishte qenë një spital psikiatrik, ambient në të cilin shtroheshin pacientë me probleme mendore dhe persona të sëmurë.
Në intervistën e tij për “The Sun”, Almunia ka rrëfyer:
“Shtëpia ime në Londër ishte e vogël, por rreth saj xhironin shumë histori të ndryshme, të cilat përfshinin historitë me fantazmat. Ajo banesë në të cilën unë jetoja, më parë kishte qenë një spital psikiatrik, ambient në të cilin shtroheshin pacientë me probleme mendore dhe persona të sëmurë gjatë Luftës së Dytë Botërore”.
“Kur u transferuam, brenda pak ditësh, nisëm që të dëgjonim zhurmë zinxhirësh që tërhiqeshin nëpër korridore e dhoma. Më pas, ndërsa flinim, magnetofoni ndizej papritur me volum në maksimum, pa e prekur njeri. Nisën realisht që të ndodhnin gjëra vërtet të çuditshme. Një natë tjetër, bashkëshortja ime më zgjoi duke ulëritur teksa flija. Më tha se kishte parë hijen e një prifti me qiri në dorë… Ajo u kap fort pas meje, ndërsa unë, edhe pse nuk pashë asgjë me sytë e mi, isha thjesht i terrorizuar, – vazhdon Almunia. – Për këtë çështje folëm edhe me fqinjët dhe ata na nënvizuan se këto fenomene ishin diçka normale. Ndoshta ishte një magji e zezë… Nuk di çfarë të them… Por sigurisht që gjërat me të cilat u përballëm dhe përjetuam në atë banesë në Londër, ishin thjesht të frikshme”.
