Gjykata e Durrësit ka dhënë masën e sigurisë “Arrest me burg” për “skifterin” 27-vjeçar Astrit Thaçi, i cili dyshohet se është autor i të paktën 8 grabitjeve që kanë ndodhur në Tiranë, Durrës dhe Elbasan.
Ndërsa për bashkëpuntoren e tij Adela Berisha, e cila njëkohësisht ishte dhe e dashura e tij, është caktuar masa “detyrim paraqitjeje”. Ajo nuk pranoi në asnjë rast që ta kishte ndihmuar Thaçin gjatë grabitjeve.
Astrit Thaçi ka shfaqur pendesë para togave të zeza para se ato ta linin në arrest me burg.
“Jam shume i penduar per veprimet e mija. Nese do te riktheja kohen pas nuk do te merresha me kete pune. Mbi te gjitha isha nen efektin e lendeve narkotike. Kam bere gabim shume te madh dhe kam abuzuar shume, qe ne momentin qe ndodhi plagosja u pendova, nga sikleti pastaj dhe per inerci kreva vjedhjen e argjendarise. Te gjithe veprat penale i kam kryer i vetem. Ne vitin 2007 u arrestova ne Itali, ne muajin nentor u lirova”, mësohet se ka thënë Astrit Thaçi sot gjatë seancës gjyqësore
Ndërsa e dashura e tij, Adela Berisha 20 vjeçe, e cila e ndihmonte të fshihej, ka thënë se njohjen me Thaçin e ka pasur përmes rrjetit social Facebook dhe se nuk ka pasur dijeni që ai vazhdontë të grabiste. Por ka rrëfyer se kur janë njohur, ai i ka treguar për të kaluarën e tij dhe e reja tha se i kishte kërkuar që të hiqte dorë nga ky ves.
“Pak kohë më parë kuptova që merrej me këtë punë dhe i kërkova të hiqte dorë. Mendova se nuk merrej më me këtë punë. Kisha lidhje serioze me Astritin, nuk ishte thjesh për të kaluar kohën. Unë e doja” mësohet se ka thënë Adela Berisha.
Astrit Thaçi autori i 8 grabitjeve, policia jep detajet (VIDEO)
