Kryedemokrati Lulzim Basha duket se i ka marrë seriozisht mendimet e qytetarëve. Pas nismës #PoTëDëgjoj ku takon qytetarët e thjeshtë, bashkëbisedimit në Facebook, pyetjes për arsimin në Instagram, sot ka hapur një sondazh.
Basha ka ftuar ndjekësit e tij në Instagram që të votojnë nëse besojnë apo jo te transparenca e qeverisë me menaxhimin e fondeve të grumbulluara në Konferencën e Donatorëve për rindërtimin pas tërmetit tragjik të 26 nëntorit.
“Jepni mendimin tuaj! Besoni tek transparenca e qeverisë për fondet e tërmetit”, shkruan Basha në InstaStory.
1.15 miliard euro janë mbledhur për Shqipërinë, nga Konferenca e Donatorëve që u mbajt të hënë në Bruksel.
Shuma e dhuruar nga shtete të ndryshme pjesëmarrëse pritet të shkoj për procesin e rindërtimit, pas tërmetit tragjik që goditi vendin.
1.15 miliard euro janë donacione, projekte dhe kredi, ndonëse kreditë përbëjnë më shumë se gjysmën e shumës, ku 160 mln u dhanë nga Banka Botërore, rreth 360 mln euro nga Banka Islamike për Zhvillim, 100 milionë euro nga Banka Europiane e Investimeve, 80 milionë euro nga BERZH dhe mbetet për t’u sqaruar dhe Franca dhe Italia se sa është kredi dhe sa grant.
