Presidenti i Këshillit Evropian, Charles Michel, ka deklaruar se darka joformale sonte në Bruksel me liderët e gjashtë vendeve të Ballkanit Perëndimor, do të jetë një mundësi për të ri-konfirmuar perspektivën evropiane të këtyre vendeve.
Ai në një postim në Twitter, para darkës joformale që pritet të zgjasë dy deri në tri orë, tha se BE duhet të thellojë bashkëpunimin strategjik për çështje si ndryshimi i klimës, multilateralizmi dhe politika e jashtme.
Në këtë darkë joformale merr pjesë edhe presidenti i Kosovës Hashim Thaçi, kryeministri i Shqipërisë Edi Rama, kryeministri kroat, Andrej Plenkoviq, vendi i të cilit ka kryesinë e radhës të BE-së.
Po ashtu në këtë takim priten të jenë edhe presidenten e Komisionit Evropian Ursula von der Leyen, si dhe përfaqësuesin e lartë të BE-së Josep Borrell.
Takimi në formën e darkës së punës është thirrur në kuadër të përgatitjeve për samitin e të gjitha vendeve anëtare të BE-së dhe vendeve të Ballkanit Perëndimor më 6 maj në Zagreb.
