Partizani ka dalë triumfues me rezultatin 1-3 kundër Laçit në transfertë, në ndeshjen e vlefshme për javën e 22-të të Kategorisë Superiore.
Skuadra vendase kaloi e para në avantazh në minutën e 28-të me anë të Xhixha-s, po përgjigja e “të kuqve” ka qenë e shpejtë teksa e përmbysën rezultatin brenda 5 minutave me rrjetat e Telushit dhe Bitrit në minutat 31’ dhe 33’. Pjesa e parë do të mbyllej 1-2 në favor të kampionëve në fuqi.
Në pjesën e dytë ndeshja ishte e luftuar me raste shënimi nga të dyja skuadrat. Por pretendimet e vendasve për një barazim të mundshëm u shuan nga Telushi, i cili realizoi golin e dytë personal dhe të tretin për skuadrën.
Kjo ishte fitorja e tretë radhazi në kampionat për Partizanin, të cilët duken se kanë lënë pas periudhën negative, ndërsa tashmë diferenca me Tiranën e vendit të dytë është ngushtuar në katër pikë.
