Kuvendi mbylli debatin mbi propozim-Ligjin për Mbrojtje i cili synon standardizimin e Armatës së Maqedonisë së Veriut me kushtet e NATO-s. Opozita kërkon që ky propozim të largohet nga procedura parlamentare, pasi sipas tyre, për ndryshimin e emrit të Armatës, marrëveshja e Prespës jep afat 5 vjeçar.
Emri i Armatës së Maqedonisë sipas Marrëveshjes së Prespës mund të ndryshohet, apo thënë ndryshe duhet patjetër të ndryshohet 5 vite pas fillimit të negociatave në kapitujt për siguri, mbrojtje dhe politikë ushtarake”, tha Ilija Dimovski, Deputet i VMRO-DPMBNE-së.
“Ju po flisni se ne do të turpërohemi. Jo, ju do të turpëroheni nga obstruksionet që i bëni jo vetëm këtij ligji për çdo ligji që kalon në Kuvend”, deklaroi Ilija Nikollovski, Partia e Pensionisteve të Maqedonisë.
Gjatë ditës Kuvendi mbylli diskutimin mbi propozim-Ligjin për Këshillin e Prokurorëve Publik. Pushteti dhe opozita shkëmbyen akuza mes vete. Palët i kujtuan njëra-tjetrës rastet kontestuese gjyqësore.
”Dy protagonistët Bujar Osmani dhe Nikolla Dimitrov që dikur fotografoheshin se kemi marr datë për negociata, sot qëndrojnë në Paris për ta bindur ministren e punëve të jashtme se jemi shtet i së drejtës dhe nuk jemi regjim hibrid. Kur u rrahën qytetarët në Shuto Orizare, Zaev tha të mos paragjykojmë për Kurto Dudushin se është fajtor, por nëse është, do të kërkoj të dorëhiqet. Dudush ishte në gjykatë dhe u dënua sikur të ketë parkuar veturën në gjelbërim”, tha Antonio Milloshoski, Deputet i VMRO-DPMNE-së.
“Nëse shohim se ku ishim në indeksin e demokracisë do ta vëreni se në vitin 2015 nga vendi i 78 kemi rënë në vendin e 95 dhe jemi shtet i robëruar. Nga 2017-2019 kemi përparuar për 18 vende dhe jemi në vendin e 77. Na duhen vetëm 3 për qind për të dal nga regjimi hibrid”, u shpreh Kostadin Acevski, Deputet i LSDM-së.
Pushteti paralajmëron se dy ligjet për Prokurori dhe ligji për Mbrojtje do të votohen në seancën e ditës së diel.
“Besoj se do të votojmë ligjin për Këshillin e Prokurorëve si dhe ligjin për media dhe uroj të kemi kohë që ta miratojmë ligjin për arsim dhe ligjin për punë të jashtme bashkë me ligje tjera. Të dielën uroj të sigurojmë 80 vota dhe ta miratojmë ligjin për Prokurori Publike dhe Ligjin për Mbrojtje”, u shpreh Artan Grubi, Deputet i BDI-së.
Nuk dihet nëse do të thirret ose jo seanca e 131 ku në procedurë kanë ngelur Ligji për Shërbimet mediatike, Ligji për Lojërat e fatit, Inspektorati i Ligjit për përdorimin e gjuhëve, masat kundër ndotjes etj. Të dielën Kuvendi do të mbaj edhe seancën e fundit për këtë përbërje duke e vendosur në rend dite pikën për shpërndarjen e institucionit ligjvënës.
Adrian Kerimi
