Një 30 vjeçar është vënë në pranga nga autoritetet holandeze, pasi dyshohet si i përfshirë në vrasjen e dy vëllezërve nga qyteti i Elbasanit, Florenc dhe Klevis Tola, 29 dhe 25 vjeç. Ngjarje kjo e ndodhur 5 vite më parë në Roterdam- IJsselmonde, në Janar të 2015 në një shtëpi në Bovenstraat.
Sipas mediave vendase, 30-vjeçari, identiteti i të cilit nuk bëhet i ditur, është arrestua në mesin e muajit Janar në Francë, ku kishte mbërritur nga Turqia dhe dyshohet se është personi, i cili kishte shoqëruar me makinë vrasësit e shqiptarëve në shtëpinë ku ndodhi krimi.
Ngjarja:
Më 15 Janar të 2015-s, policia gjeti të vrarë me breshëri plumbash dy vëllezërit Tola, në një shtëpi në IJsselmonde. Në banesë autoritetet gjetën 21 plumba, dhe shenja se mes palëve kishte pasur shkëmbim zjarri. Në banesë u gjet gjithashtu drogë.
Pak kohë pas ngjarjes në pranga u vu një 28-vjeçar nga Shqipëria, i identifikuar nga mediat në atë kohë me emrin Herald R. Prokuroria holandeze kërkoi 20 vjet burg për të me akuzën e vrasjes së dyfishtë, por ai u shpall i pafajshëm nga gjykata e Roterdamit, për mungesë provash. Shqiptari u dënua me 4 vjet burg për posedim droge e armësh.
Vendimi i gjykatës u apelua nga prokuroria, por seanca është shtyrë për shkak të arrestimit të ri të bërë për çështjen në fjalë.
Pas ekzekutimit të dy vëllezërve nga Elbasani dyshohet se qëndronin pazaret e drogës.
