Dritan Dajti dhe Xhevdet Troplini janë dy individët e radhës të cilëve u është kërkuar vetdeklarimi pasurisë nga i ashtuquajturi “Operacioni Forca e Ligjit”. Burime zyrtare nga OFL deklaruan këtë të hënë se të dyve u janë dërguar kërkesat për vetëdeklarim të pasurisë.
“Në zbatim të detyrave të përcaktuara në Aktin Normativ të datës 31 janar 2020, vijon operacioni Forca e Ligjit, për dërgimin e kërkesave për vetëdeklarim të pasurisë, si dhe për sekuestrimin e pasurisë në kushtet e emergjencës. Në këtë kuadër, OFL u ka dërguar kërkesat për vetëdeklarim të pasurisë shtetasve: Dritan Dajti, me banim në Tiranë, i dënuar për veprat penale: “Vrasja në rrethana të tjera cilësuese”, “Mbajtja pa leje e armëve luftarake”, “Falsifikimi i dokumenteve”, “Falsifikimi i vulave, stampave ose i formularëve” dhe “Mbajtja pa të drejtë e uniformës”; Xhevdet Troplini, me banim në Durrës, i dënuar për trafikim të lëndëve narkotike. Këta individë, si subjekt i Ligjit Special, duhet t’u përgjigjen me shkrim, brenda 48 orësh, të gjitha pyetjeve të OFL-së. Më pas, përgjigjet e marra do t’i dërgohen SPAK-ut, për veprime të mëtejshme”, njoftoi policia.
