Për Shqipërinë nuk duhet të ketë plan “B” veç atij të integrimit në BE. Është ky mesazhi që Ambasadori i BE-së, Luigi Soreca, ka dhënë ditën e sotme, kur prezantoi metodologjinë e re të zgjerimit të BE-së.
Soreca tha se politikantë shqiptarët duhet të bëhen bashkë, ndërsa vuri theksin te stabiliteti.
“Çelja e negociatave është një objektiv që e ka pjesa dërrmuese e shoqërisë shqiptare. 88% e qytetarëve shprehen se kanë mendim pozitiv për BE-në. Për shqiptarët nuk duhet të ketë plan‘B’ përveç anëtarësimit në BE.
97 % e shqiptarëve mbështesin integrimin e vendit në Bashkimin Evropian. Politikanët të bëhen bashkë për të mirën e vendit, duhet stabilitet.
Sfida mbeten korrupsioni, punësimi dhe reforma në drejtësi. KE po mbledh informacionet për Shqipërinë. 92 % e shqiptarëve mendojnë se jeta e tyre do përmirësohet pas integrimit në BE”, tha Soreca.
Kreu i Delegacionit të BE-së tha se sondazhi u krye në fund të vitit të shkuar me anë të intervistave.
“Të intervistuarit kanë qenë 1130, duke mbuluar të gjithë vendin”, u shpreh Soreca.
Ndërkohë, lidhur me strategjinë e re, ai u shpreh se BE mund të pezullojë negociatat nëse do të ketë hapa pas.
“Liderët e BE do të kenë të paktën një debat në vit për ecurinë që do të kenë bërë vendet e Ballkanit Perëndimor dhe ky do të jetë një proces mjaft i rëndësishëm.
Procesi do të jetë edhe më dinamik dhe kjo do të ndodhë duke krijuar grupime kapitujsh të ndryshëm.
Ne kemi propozuar 6 fusha kryesore, me më shumë se 35 kapituj. BE do të mund të pezullojë, madje edhe të ndalojë negociatat, në rast se kjo do të jetë e nevojshme”, tha ai.
