Botuesja, Arlinda Dudaj ka qenë ditën e djeshme e ftuar në “E diell”, në një intervistë ku foli edhe për debatin me Eli Farën, debat i cili bëri bujë pesë vite më parë. Asokohe e ftuar në “Opinion”, teksa po flitej për femrat e bukura, Arlinda shprehu hapur mendimin e saj duke mos e konsideruar Eli Farën si një femër të bukur. Ky mendim i saj u kundërshtua në studion e emisionit e më pas hapi debat në rrjete sociale.
Eli Fara nuk e ka pritur mirë deklaratën e botueses Dudaj kundrejt saj. Në një prej komenteve në Instagram këngëtarja ka shkruar: “Sa keq duken ca qenie ‘njerëzore’ që nuk iu dallon dot gjininë… dhe iu jepet e drejta e fjalës apo gjykimit…Uaaa!!! Qesharaket pa vlera… Sa Gjynah!!!”. Në mbështetje të këngëtares korçare ka qenë edhe mikesha e saj këngëtarja, Aurela Gaçe. “Aq shumë plasin ca, sa nuk bëjnë dot as hipokriten. Kushedi çfarë halli kanë”, ka shkruar në një koment Aurela Gaçe. Eli Fara ka komentuar edhe më tej në këtë postim duke shkruar: “Vallë duhet të merret njeriu më këto lloj insektesh”, duke iu referuar ndoshta botueses Arlinda Dudaj.
Mirëpo pas kaq shumë kohësh, Arlinda e ka sqaruar deklaratën e ftuar sot në “E diell”, duke thënë se secili ka shijet e veta sa i përket bukurisë.
“Unë kam dashur Elit t’i kërkoj një lloj falje, më shumë sqarim sesa falje. Nuk është kjo bukuria që mua më pëlqen. Madje bukuria që më pëlqen mua mund të mos jetë fare e bukur, mund të mos jetë ajo që i pëlqen të gjithëve”, u shpreh Arlinda Dudaj.
“Eli është shumë e bukur dhe nuk ka pikë dyshimi”, tha botuesja.
