Ikona e NBA, Kobe Bryant, ndërroi jetë në moshën 41-vjeçare pas një aksidenti tragjik me helikopter (të dielën, 26 janar), ndërsa bashkë me të vdiq edhe vajza e tij 13 vjeçare, Gianna dhe shtatë njerëz të tjerë.
Një fakt interesant që jo të gjthë e dinë është se ai ka qenë reper nga fundi i viteve ’90 dhe pikërisht në atë periudhë u njoh me bashkëshorten e tij, Vanessa.
Ai e takoi partneren e tij gjatë xhirimeve të një videoje muzikore në vitin 1999, ndërsa këtë ngjarje e kishte rrëfyer në dokumentarin e vitit 2015, “Kobe Bryant’s Muse”.
“Ishin xhirime dyditore të videoklipit dhe unë vazhdimisht e kërkoja atë, sikur doja ta di se ku ndodhej. E përfundoja një skenë dhe shkoja te rimorkioja ime, por pyetesha gjatë gjithë kohës se ku ndodhej. Pastaj, dilja nga rimorkioja dhe doja të flisja me të më shumë”, ka rrëfyer Bryant në dokumentarin e publikuar pesë vite më parë nga ‘Showtime’.
Pas xhirimit të klipit, Kobe ia mori numrin Vanessas dhe filluan të kontaktonin më shpesh dhe nga aty filloi historia e tyre e dashurisë që u shtua me 4 vajza por fatkeqësisht njëra prej tyre humbi jetën në aksidentin tragjik së bashku me të atin, Kobe Bryant.
