Policia ka zbardhur përplasjen me armë të mbrëmjes së djeshme në qytetin e Shkodrës ku mbeti e plagosur aksidentalisht 35 vjeçarja Liljana Jeremia.
Uniformat blu kanë prangosur tre shtetasit Ardjan Rexha, 31 vjeç, banues në Durrës, Ension Buraku, 28 vjeç, banues në Durrës dhe Riad Xheladini, 22 vjeç, banues në Shkup, Maqedoni.
Gjithashtu është shpallur në kërkim shtetasi Mersad Meta, 26 vjeç, banues në fshatin Berdicë, Shkodër. Ky ishte pronari i BMW e cila u dëmtua nga breshëria e plumbave.
Mësohet tre të arrestuarit kanë qëlluar me armë zjarri ndaj shtetasit Mersad Metës, i cili dhe ky iu është kundërpërgjigjur me armë zjarri.
Po nga hetimet dyshohet se këta shtetas kishin konflikte të hershme me njëri -tjetrin.
Nga përplasja me armë mbeti e plagosur aksidentalisht në këmbë shtetasja Liljana Jeremia pasi ishte thjesht një kalimtare që ka kaluar rastësisht në vendngjarje.
Policia ka gjetur 10 gëzhoja në vendngjarje dhe ka sekuestruar kamerat e sigurisë. Gjithashtu në vendngjarje është gjetur dhe sekuestruar edhe automjet që i përket Mersad Metës.
Materialet iu referuan Prokurorisë së Rrethit Gjyqësor Shkodër, për veprat penale “Vrasja në rrethana të tjera cilësuese”, “Plagosja e lehtë me dashje” dhe “Armëmbajtja pa leje”.
