Qytetarët e Matit kanë hedhur në gjyq disa institucione shtetërore që kanë dhënë lejen për ndërtimin e HEC-eve në lumenjtë Sekë dhe Zais, që rrjedhin në parkun kombëtar Zall-Gjoçaj.
Seanca zhvillohet sot, në orën 15.30, pranë Gjykatës Administrative të Shkallës së Parë, Tiranë.
Padia është paraqitur në emër të nëntë qytetarëve, banorë dhe persona që kanë pronat e tyre në zonën ku po ndërtohen HEC-et. Në cilësinë e paditësit është dhe JOF “EccoAlbania”. Në cilësinë e palëve të paditura janë thirrur: Ministria e Turizmit dhe Mjedisit, Agjencia Kombëtare e Mjedisit, Këshillimi i Basenit Ujor Mat, Këshilli Kombëtar i Territorit, Ministria e Infrastrukturës dhe Energjisë, Shoqëria “Seka Hydropower” shpk (që ka kontrata koncesionare për ndërtimin e HEC-eve Sekë dhe Zais). Ndërkohë, Bashkia Mat është thirrur në cilësinë e personit të tretë në gjykim.
Pala paditëse kërkon shpalljen e pavlefshmërisë së “deklaratës së Mjedisit të Urdhrit të Ministrit të Mjedisit dhe Turizmit që ka miratuar heqjen nga fondi pyjor të sipërfaqes ku po ndërtohen HEC-et, të Lejes së Ndërtimit, të shkresës së Agjencisë Kombëtare të Zonave të Mbrojtura për miratimin e projektit, të Lejes së Përdorimit të Ujit”.
Në kërkesë-padi, nga ana e palës paditëse, janë argumentuar shkeljet ligjore sipas tyre, të institucioneve publike, ndërkohë që një pjesë e këtyre shkeljeve është konstatuar dhe nga Raporti i Gripit Ndërinstitucional të Punës, të ngritur për të verifikuar projektin.
Banorët kanë protestuar më herët kundër ndërtimit të HEC-it në Mat.
