Said Chabane, presidenti i klubit të Angers në Ligue 1 në Francë, është arrestuar nga policia ditën e sotme.
55-vjecari akuzohet për ngacmim seksual nga punonjëset e tij. Sipas shtypit francez, gjithçka ka nisur nga një ankesë e paraqitur prej një punonjëseje të klubit të Ligue 1 më 7 janar.
Me hapjen e hetimit, policia ka marrë në pyetje edhe persona të tjerë. Të paktën dy prej tyre do të konfirmonin që Chabane, president i Angers, i ngacmonte seksualisht punonjësit që nga viti 2011. Sipas raporteve nga “RMC”, Chabane dyshohet se i “sulmonte” gratë, duke i prekur në vithe, pjesët private, gjinj, pa pëlqimin e tyre.
Me një deklaratë zyrtare, Angers shpjegon se “Chabane i kundërshton zyrtarisht të gjitha akuzat e ngritura kundër tij dhe do të paraqesë para drejtësisë të gjithë elementët që lejojnë të rivendosin të vërtetën dhe të ruajnë nderin e tij. Presidenti është i vendosur të provojë pafajësinë e tij dhe beson në rezultatin e hetimit, për të cilin po bashkëpunon plotësisht”.
E gjitha kjo ndodh në një kohë, kur prej ditësh me radhë po flitet për skandalin seksual në Francë, që përfshin notin dhe patinazhin.
