Almiron Shehu, 27 vjeçari nga Gjirokastra që alarmoi policinë duke mos iu bindur postblloqeve nga Korça deri në Elbasan, është vënë në pranga.
Mbi të rëndojnë akuzat për veprat penale “Vrasja e punonjësve të Policisë së Shtetit, e mbetur në tentativë”, “Mosbindja ndaje urdhrit të punonjësit të Policisë së Rendit Publikë”, Shkelja e rregullave të qarkullimit rrugor” dhe “Drejtimi i automjeteve në mënyrë të parregullt”.
27-vjeçari, drejtues i automjetit tip “Volsvagen Pasat”, nuk iu bind urdhrave të përsëritura të policisë për të ndaluar dhe për këtë shkak forcat e rendit iu vunë pas. Ndjekja përfundoi duke goditur makinën e policisë së Elbasanit dhe shkaktoi aksident të shumëfishtë me 4 persona të plagosur, mes tyre dhe një efektiv policie, Eugen Abdurrazaku.
Përpara bluve, 27-vjeçari që ka pasur një histori të ngjashme me policinë, ka thënë se kishte dyshime se po e ndiqte një fuoristradë.
NJOFTIMI
Vihet në pranga drejtuesi i mjetit që goditi me makinë punonjësin e Policisë në detyrë.
Specialistët për Hetimin e Krimeve të Rënda ndaj Personit dhe Pasurisë në Drejtorinë Vendore të Policisë Elbasan, në përfundim të veprimeve të para hetimore arrestuan në flagrancë, për veprat penale “Vrasja e punonjësve të Policisë së Shtetit, e mbetur në tentativë”, “Mosbindja ndaje urdhrit të punonjësit të Policisë së Rendit Publikë”, Shkelja e rregullave të qarkullimit rrugor” dhe “Drejtimi i automjeteve në mënyrë të parregullt”, shtetasin: A. SH., 27 vjeç, banues në Gjirokastër.
Arrestimi i tij u bë, pasi ditën e djeshme, duke drejtuar mjetin tip “Passat”, nuk i ka ndaluar shërbimeve të policisë Korçë, Pogradec, Librazhd dhe është larguar me shpejtësi të madhe në drejtim të qytetit të Elbasanit. Forcat “Shqiponjat”, ato të Patrullave të Përgjithshme dhe të Qarkullimit Rrugor, në hyrje të qytetit Elbasan, në aksin rrugor Librazhd-Elbasan, ngritën pikë kontrolli. Drejtuesi i mjetit ka tentuar të largohet duke goditur makinën e Policisë dhe dy mjete të tjera. Si pasojë është plagosur jashtë rrezikut për jetën një punonjës policie, shtetasi E. A., 27 vjeç dhe 4 shtetas të tjerë.
