Policia e Shtetit ka bërë të njohur rezultatet e ditës së parë të operacionit anti-KÇK. Kështu pas sekuestrimit të një resorti në Shijak, një punonjëse e policisë, u shfaq me syze të errëta, duke lexuar një deklaratë mbi veprimtarinë e OFL-së.
Ajo tha se në zbatim të ligjit special për masat pasurore të individëve të dënuar apo akuzuar për krim të organizuar, OFL sapo i ka nisur kërkesën me shkrim për tu plotesuar me shkrim shtetasit : L.B 49 vjec, lindur e banues në Durrës, drejtues i një grupi kriminal autor i veprave penale “grup i strukturuar kriminal”, “trafikim i lëndëve narkotike” “pastrim i produkteve te veprave penale”. Ky shtetas në vitin 2012 është dënuar me burg të përjetshëm e në 2016 gjykata e Apelit te Durrësit ka vendosur lirimin e tij me kusht. Sikundër mësohet, L.B është shtetasi Lulzim Berisha.
Ndërkohë, zyrtarisht u deklarua se gjithashtu shtetasit “A.Ç, 52 vjec i arrestuar në flagrancë për vrasje të punonjësve të policisë, i mbetur në tentative dhe “armëmbajtje pa leje”, i është kërkuar që brenda 48 orëve të plotësojë dhe dorëzojë formularin.
“Ky shtetas dyshohet si një organizator i një sërë vrasjesh të ndodhura në Elbasan për motive hakmarrje. Dyshohet se ky shtetas së bashku me të afërm të tij ka kryer vrasje me pagesë për periudhen 2009-2016”, tha zyrtarja e policisë, e shfaqur gjysëm e maskuar. Sikundër raportohet shtetasi A.Ç është Ardian Çapja.
Si subjekt i ligjit special, këta individë duhet të përgjigjen brenda 48 orësh me shkrim e më pas përgjigjet e marra i dërgohen SPAK-ut, i cili brenda 15 ditësh duhet të dërgojë kërkesën në Gjykatën Speciale, e cila gjithashtu duhet të shprehet brenda 15 ditëve, dhe brenda 6 muajve duhet të merret vendimi përfundimtar mbi pasuritë.
“Sqarojmë se me marrjen e masës së sekuestros, çdo biznes, mjetet motorike apo tokat në pronësi të subjekteve administrohen nga agjencia e posaçme e Ministrisë së Brendshme. Vetëm banesa mund të vazhdojë të përdoret për strehim, po as mund të shitet, të blihet apo të jepet me qira nga subjekti.
OFL do të informojë publikun vijimësisht, për të gjitha nismat procedurale dhe operacionet ekzekutive që do të kryejë. Të gjitha subjektet e Ligjit Special, pra të gjithë të dënuarit apo të akuzuarit gjatë 30 viteve të fundit, për krimet e parashikuara në këtë ligj, do të kalojnë sitën e provës së ligjshmërisë së pasurisë së tyre. Asnjë përjashtim nuk do të ketë dhe nuk mund të ketë dhe çdo përpjekje për të tjetërsuar ndërkohë pronën, duke përdorur familjarë apo të njohur, do të rëndojë të dyja palët. Kujtojmë se Ligji Special parashikon vlerësime dhe hetime specifike të pasurisë edhe për rrethin familjar të personave të dënuar apo akuzuar për krim të organizuar e krime të rënda”, thuhet në deklaratën zyrtare.
