Lulzim Cuko, 45-vjeçari i dyshuar si autor i vrasjes së bashkëshortes në banesën e tyre në Xhafzotaj të Durrësit, ka pranuar krimin dhe ka shprehur pendesë. Në dëshminë e tij për uniformat blu, ai ka zbuluar dhe shkaqet e vrasjes.
“Jam penduar shumë për veprimin tim. Nuk duhet të kishte ndodhur kjo, nuk duhet të kisha qëlluar mbi Manjolën. Fëmijët e mi ngelën rrugëve tani. Jam shumë i dëshpëruar. Tentova disa herë të vetëvritesha, por nuk ia dola. Sherri i fundit ndodhi, pasi prej kohësh kishim debate. Kisha dyshime se ajo fuste njerëz të tjerë në shtëpinë tonë, ndërkohë që unë isha në Greqi. E kishte kthyer shtëpinë në shtëpi publike, fuste brenda lloj-lloj njerëzish. I kërkova të mos e bënte më këtë veprim, por sapo unë ikja në Greqi me thoshin njerëzit se ajo vazhdonte të fuste njerëz të panjohur në shtëpi. Për këtë arsye u ktheva nga Greqia. Gjatë kësaj kohe debatonim shpesh. Parmbrëmë situata doli jashtë kontrollit dhe unë e qëllova me thikë. Nuk mendova se ka vdekur, pasi e lash të shtrirë në tokë. Nga mediat e dëgjova që kishte ndërruar jetë. Më vjen shumë keq, sidomos për fëmijët që mbetën në mëshirë të fatit”, mësohet të jetë shprehur 45-vjeçari.
Disa orë pas vrasjes, 45-vjeçari u dorëzua në ambientet e komisariatit të Policisë së Burrelit. Mësohet se çifti ka tre fëmijë, një djalë dhe dy vajza, të moshës dhjetë, shtatë vjeç dhe 2 vjeç. 45-vjeçari shkonte herë pas here në Greqi, ku punonte si emigrant.
