Kryeministri Edi Rama ka publikuar një video, ku shfaqet njësia speciale, e cila duke nisur nga dita e hënë, del në terren në kuadër të zbatimit të ligjit anti-KÇK.
Ajo që bie në sy nga video e publikuar është se pjesëtarët e kësaj njësie janë të maskuar, madje mbajnë maska edhe kur bëjnë stërvitje.
Pamjet me efektivët e OFL publikohen një ditë pasi qeveria miratoi aktin normativ, i cili ka shkaktuar debate dhe kundërshti të shumta, pasi kompetencat që i jepen policisë janë ato që deri më sot i kishin prokurorët apo gjykatat.
“OFL (Operacioni Forca e Ligjit) është Njësia Speciale që pas 6 muajsh trainimesh të specializuara dhe stërvitjeje me ngarkesë të lartë fizike, del në terren ditën e hënë për të zbatuar në bashkëpunim me SPAK-un, Ligjin Special të sapomiratuar për masat pasurore ndaj personave të dënuar ose akuzuar për krim të organizuar”, shkruan Rama në rrjet.
