Një efektive e policisë shqiptare është arrestuar nga karabinierët në Itali, pasi në makinën me të cilën lëvizte është gjetur kokainë, raportojnë këtë të shtunë mediat italiane. Sipas të njëjtave burime, efektivja e arrestuar është me iniciale F.Z. 29 vjeçe, e vënë në pranga bashkë me një tjetër person që ishte me të në makinë.
Aksioni
Ndërhyrja e karabinierëve u bë në komunën Garbagnate Milanese, në Milano. Gjatë një shërbimi të kontrollit të territorit në rrugën “Settembre XX”, efektivët ndaluan një “Renault Clio Sw”, (që më vonë rezultoi se ishte marrë me qera) me dy shqiptarë në bord: C.A., 29 vjeç dhe shoferja F.Z., 29-vjeçe me profesion inspektore e Policisë Shqiptare. Pyetjeve nga karabinierët, të dy iu përgjigjën normalisht, por qëndrimi i tyre i dyshimtë dhe i kujdesshëm i shtyu efektivët të vijonin me kontrollet e dokumenteve.
Kërkimet e mëpasshme personale dhe i automjeteve nxori në dritë një skenar tjetër: të dy udhëtonin me 38 gram kokainë, e ndarë në 76 doza të paketuara me letër alumini dhe 1.430 euro, të konsideruara nga hetuesit si të ardhura nga droga. Droga dhe paratë mbaheshin në një qese të fshehur në një ndarje nën volantin e automjetit.
Të dy u vunë në pranga për mbajtje të lëndëve narkotike me qëllim trafikimin dhe u dërguan në stacionin e policisë, ku kaluan natën. Të nesërmen, dolën para Gjykatës së Milanos, që cilësoi të ligjshëm arrestimet dhe la nën masën e arrestit shtëpiak 29-vjeçarin. Ndërsa për efektiven e policisë vendosi detyrim paraqitje. /BN/
