Nga BoldNews.al
Këshilli i Lartë i Prokurorisë miratoi të Premten prokurorin e nëntë të SPAK-ut, ndërkohë që ka “modifikuar” kërkesën e drejtuesit të Prokurorisë Speciale për komandimin e dy prokurorëve të tjerë, për shkak të volumit të lartë të punës dhe numrit të ulët të burimeve njerëzore.
Doloreza Musabelliu, ish-prokurore e Krimeve të Rënda, i bashkohet trupës aktuale prej 8 prokurorësh, pas konfirmimit së fundmi në detyrë, me vendim të formës së prerë nga strukturat e Vetingut.
Me gjithë rekrutimin e Musabelliut, sërish struktura speciale hetimore është në mungesë të prokurorëve. Paketa ligjore e Reformës në Drejtësi parashikon që SPAK të ketë 15 prokurorë dhe numri minimal i nisjes së aktivitetit ishte 10.
Por, Këshilli i Lartë i Prokurorisë, në Dhjetor 2019, vendosi t’i japë jetë Strukturës së Posaçme Anti-Korrupsion vetëm me 8 prokurorë, ndërkohë që kandidatët e tjerë që plotësonin listën prej 15 emrash, ishin në pritje të përfundimit të procesit të Vetingut.
Me kërkesë të drejtuesit të SPAK-ut, Arben Kraja, Këshilli i Lartë i Prokurorisë vendosi të caktonte përkohësisht dy prokurorë në Strukturën e Posaçme, e konkretisht Dritan Prençi dhe Vladimir Mara, të cilët kishin në dorë hetimin e dosjes voluminoze “339” që në kohën kur ishin tek Krimet e Rënda.
Megjithë afrimin e këtyre dy prokurorëve si të komanduar, drejtuesi i SPAK-ut kërkoi nga Këshilli i Lartë i Prokurorisë që të aprovonte kërkesën edhe për dy prokurorë të tjerë të komanduar, me qëllim përballimin e volumit të punës, deri në zgjedhjen definitive të anëtarëve të SPAK-ut.
Arben Kraja kishte në mendje dy emra për t’i propozuar KLP-së për t’i komanduar në strukturën që drejton ai. Emri i parë ishte Eloida Goxhi, aktualisht drejtuese e Prokurorisë së Beratit. Ndërsa emri i dytë ishte Sotir Kllapi, aktualisht drejtues i Prokurorisë së Pogradecit.
Prokurorët Goxhi dhe Kllapi kanë përfunduar të dy Shkollën e Magjistraturës, kanë kaluar me sukses procesin e Vetingut dhe plotësojnë kriteret formale për “ngritjen në detyrë”, si pjesë e SPAK-ut.
Këshilli i Lartë i Prokurorisë vendosi të modifikojë disi kërkesën e drejtuesit të SPAK-ut. Në mbledhjen e datës 28 Janar 2020, KLP shpalli thirrjen për aplikimin për plotësimin në mënyrë definitive të dy vendeve vakante në SPAK.
Për këto dy vende është krijuar vakanca, pas shkarkimit të kandidatëve të përzgjedhur në 15-shen e parë.
Vakanca e parë u krijua nga shkarkimi i prokurorit Besnik Muçi në Kolegjin e Posaçëm të Apelimit. Prokurori Muçi u dekretua si anëtar i Gjykatës Kushtetuese nga Presidenti i Republikës, para se Këshilli i Lartë i Prokurorisë ta emëronte si anëtar i SPAK. Megjithatë, Muçi doli përfundimisht jashtë sistemit të drejtësisë, pas vendimit të shkarkimit nga detyra, marrë nga shkalla e dytë të Vetingut.
Vakanca e dytë është krijuar nga shkarkimi në shkallën e parë të Vetingut të kandidatit tjetër, prokurorit Ndini Tavani.
Megjithëse shkarkimi i Tavanit nuk është i formës së prerë dhe ai ka kundërshtuar vendimin në Kolegjin e Posaçëm të Apelimit, sërish ligji ka parashikuar përjashtimin nga kandidimi për SPAK të aplikantëve që janë rrëzuar në shkallën e parë, pavarësisht vendimit përfundimtar.
Gara për dy vende vakante në SPAK pritet të zhvillohet ndërmjet prokurorëve të komanduar, Vladimir Mara e Dritan Prençi, me prokurorët e sugjeruar nga drejtuesi i SPAK-ut, Eloida Goxhi dhe Sotir Kllapi.
Dy të komanduarit, Prençi e Mara, nuk u kualifikuan në përzgjedhjen e 15-shes së parë, të listuar nga Këshilli i Lartë i Prokurorisë, në Korrik të vitit 2019. Tashmë, me shumë mundësi, ata do të tentojnë sërish për të siguruar emërimin në Strukturën e Posaçme Anti-Korrupsion.
Momentalisht, SPAK ka 9 prokurorë të emëruar: Arben Kraja, Edvin Kondili, Altin Dumani, Ened Nakuçi, Klodian Braho, Enkelejda Millonai, Elida Kackini (Celami), Behar Dibra dhe Doloreza Musabelliu.
Janë në pritje të vendimit të formës së prerë prokurorët Anita Jella dhe Anton Martini, të cilët u konfirmuan në detyrë nga Komisioni i Pavarur i Kualifikimit, por vendimet e tyre ende nuk janë zbardhur dhe nuk është thënë fjala e fundit nga Komisioneri Publik nëse do të ushtrojë të drejtën e ankimit.
Kandidatja tjetër, drejtuesja e komanduar e Prokurorisë së Tiranës, Elisabeta Imeraj, është në pritje të përballjes me shkallën e parë të Vetingut, Komisionin e Pavarur të Kualifikimit.
Ndërsa kandidatja tjetër, Manjola Kajana, ende nuk është konfirmuar në detyrë me vendim të formës së prerë. Vendimi i KPK-së për konfirmimin e saj në detyrë pritet të shqyrtohet nga Kolegji i Posaçëm i Apelimit, pas ankimit të Komisionerit Publik.
