Paul Burrel, ish shërbetori i Lady Dianës ka bërë për herë të parë publike një letër personale, të shkruar nga princesha e ndjerë. Në një kohë kur të gjithë po flasin për vendimin e Harry-t dhe Meghan për të jetuar të pavarur nga pjesa tjetër e familjes, larg detyrave mbretërore dhe zhurmës mediatike, që i ka shoqëruar që prej njohjes së tyre e deri më tani, Paul ka risjellë në vëmendje një letër që Diana i kishte shkruar para disa vitesh.
Në një postim në llogarinë e tij në Instagram, ai risjell në vëmendje fjalët e princeshë Dianës duke mbështetur kështu në mënyrë publike vendimin e Harry-t, siç do të kishte bërë edhe Diana.
“I dua fëmijët e mi deri në vdekje shpresoj që farat që kam mbjellë të rriten dhe të sjellin forcën, dijen dhe qëndrueshmërinë që duhet” – ka shkruar princesha me dorën e saj. Letra është shoqëruar me një foto bardhezi të Lady Dianës dhe dy djemve të saj, Princ William dhe Princ Harry-n.
Në dixhiturën e fotos, Paul i cili ka qënë dikur ndër njerëzit më të besuar të Dianës ka shkruar ” Ndërkohë që Harry dhe Meghan po përgatiten të fillojnë një jetë të re, më kujtohen disa fjalë mallëngjyese, të cilat Princeshë Diana më shkroi para disa vitesh. Këto janë fjalë nëne, të cilat shprehin dashuri të pakushtëzuar të cilat janë po aq aktuale sot,sa edhe kur i shkroi 24 vjet më parë.
Kur lajmi i largimit të princ Harry-t dhe bashkëshortes së tij Meghan nga roli i tyre në familjen mbretërore u bë publik, Paul Burrel u shpreh se “me siguri Lady Diana do të kishte menduar vetëm për lumturinë e djalit të saj.”
Paul nuk ka qënë thjesht pjesë e stafit të Dianës, por edhe një nga miqtë e saj më të mirë, të cilit dikur princesha i besoi shumë nga sekretet dhe gjërat e saj personale.
