Në eksperiencën e tij në Torino, Cristiano Ronaldo nuk i ka përmirësuar ende numrat e tij të mëdhenj te Real Madridi, por kjo nuk do të thotë që sulmuesi nga Madeira po zhvillon sezone të këqija në nivelin si golashënues.
Që nga mbërritja e tij te Juventusi, CR7 po mban një mesatare prej 0.69 golash për ndeshje (48 gola në 69 ndeshje), çka është mesatarja më e mirë te bardhezinjtë për 60 vite.
Në të dhënat e mbledhura nga “A Bola”, vetëm Omar Sívori, golashënuesi i pestë në historinë e “Zonjës së Vjetër”, kishte një mesatare finalizimi më të mirë se portugezi, kur arriti 50 gola. Italiani e regjistroi atë efikasitet para portave kundërshtare në 65 ndeshje (jo 69 apo më shumë, që do të marrë portugezi).
Këtë fundjavë, “7” e Juventusit do të ketë mundësinë për ta arritur këtë rekord, nëse shënon dy gola kundër Fiorentinës. Duke pasur parasysh formën e mirë që po kalon, dopieta ndaj vjollcëve nuk është diçka e pamundur. Që nga dhjetori, Cristiano ka shënuar 14 gola në vetëm 11 ndeshje midis Serie A, Kupës së Italisë, Superkupës së Italisë dhe Ligës së Kampionëve.
Deri më tani, këtë sezon, 34-vjeçari ka shënuar 20 gola, 17 prej të cilëve në Serie A. Ai është golashënuesi i dytë më i mirë në kampionatin Italian, për momentin, pas Ciro Immobile (Lacio) me 23 gola.
