Shënohen dy rastet e para me virusin kinez “Corona” Në Itali. Dy turistë kinezë janë duke u trajtuar në institutin kombëtar të sëmundjeve infektive Spallanzani në Romë. Ata qëndruan për 10 ditë në Hotel Palatino, ndërsa dhoma e hotelit tashmë është mbyllur. Pacientët janë burrë e grua të moshës 66 dhe 67 vjeç.
Lajmin e ka konfirmuar kryeministri italian Giuseppe Conte, së bashku me ministrin e Shëndetësisë Roberto Speranza.
“Jemi tepër të vëmendshmë, nuk na ka kapur të papërgatitur”, tha ndër të tjera kryeministri italian Conte.
Po ashtu autoritetet italiane kanë bllokuar dhe kontrolluar një autobus me turistë kinezë, e njëjta linjë me të cilën kishin udhëtuar dhe dy të prekurit me virusin kinez.
Pas konfirmimit të dy rasteve, Italia është bërë i pari shtet në botë që ka bllokuar të gjitha fluturimet me Kinën.
Më herët në një anije me 7,000 turistë u bllokua në Portin Civita Vecchia pranë Romës pas dyshimeve për të infektuar me virusin vdekjeprurrës, kontrollet rezultuan negative.
Koronavirusi dhe përhapja e tij ka filluar të shqetësojë të gjithë botën. Çdo moment shtohen rastet me të prekur nga ky virus.
Gjendja e jashtëzakonshme
Ndërkohë, Këshilli i Ministrave në Itali shpalli një gjendje të jashtëzakonshme gjashtë mujore si pasojë e rrezikut shëndetësor të lidhur me koronavirusin. Këshilli i Ministrave vendosi alokimin e 5 milion €. Një rezolutë do të hartohet nga Mbrojtja Civile dhe Ministria e Shëndetësisë.
