Rey Manaj bën menjëherë hapin e madh. Aventura e tij te Barcelona B ka nisur në mënyrën më të mirë të mundshme. Pas debutimit pozitiv me skuadrën B në kategorinë e tretë të futbollit spanjoll, sulmuesi i kombëtares shqiptare është grumbulluar nga trajneri i skuadrës së parë të Barcelonës Quique Setien për ndeshjen e sotme në Kupën e Mbretit, sfidë teke për raundin e 1/8-ve të cilën Barça do ta luajë në “Camp Nou”.
Manaj këtë të mërkurë është stërvitur përkrah yjeve të Barcelonës si Messi, Griezzman, Rakitiç etj, siç duket qartë edhe në fotot e publikuara nga klubi katalanas. Manaj nuk është i vetmi nga skuadra B pasi janë thirrur edhe futbollistë të tjerë si Pena, Puig e Colado. Manaj shpreson që të debutojë me Barçën në këtë sfidë, qoftë edhe duke u aktivizuar nga stoli. Grumbullimi në skuadrën e parë është një lajm i madh për Manajn i cili do të përpiqet ta shfrytëzojë në maksimum.
