Parlamenti i Skocisë ka votuar për mbajtjen e referendumit të ri për pavarësi nga Britania e Madhe.
Kjo lëvizje pritet të rritë presionin mbi qeverinë britanike, në një kohë kur Britania është duke dalë nga BE’ja. Ligjvënësit në kryeqytetin e Skocisë, Edinburg, votuan me 64 vota pro dhe 54 kundër për referendumin e ri.
Sidoqoftë, vota do të ketë pak efekte të menjëhershme. Një referendum me rezultat të detyrueshëm nuk mund të mbahet pa miratimin e qeverisë Britanike dhe kryeministri Boris Johnson këtë muaj refuzoi kërkesën e qeverisë skoceze për një referendum mbi pavarësinë. Johnson argumenton se plebishiti i 2014 në të cilin skocezët e refuzuan pavarësinë, ishte cilësuar si një votim që mbahet një herë në një gjeneratë dhe se duhet të qëndrojë në fuqi. Qeveria skoceze që mbështet pavarësinë, thotë se Brexiti ndryshon gjithçka.
Britania si e tërë votoi për daljen nga BE në 2016, por zgjedhësit në Skoci në një masë të madhe votuan për të qëndruar në bllok. Britania e madhe tani do të dalë nga BE të premten. Kemi vetëm pak orë kohë para se të humbasim anëtarësinë tonë në BE dhe të gjitha të drejtat që sjell kjo, tha kryeministrja skoceze Nikola Sturgeon. Për këndvështrimin tim, e vetmja mënyrë realiste që Skocia të mbetet në zemër të Europës është që ne bëhemi një vend i pavarur. Ligjvënësit skocezë po ashtu votuan për të mbajtur të ngritur flamurin e bashkimit evropian jashtë parlamentit skocez edhe pas Brexitit.
