Një grua ka humbur jetën si pasojë e një aksidenti të ndodhur rreth orës 15:00 të kësaj të mërkure, në aksin rrugor Koplik – Dedaj.
Sipas hetimeve paraprake, një makinë tip “Benz” doli nga rruga dhe u përplas me sinjalistikën rrugore në vendin e quajtur “Ura e Zhajës”, në fshatin Zagorë të Malësisë së Madhe. Mjeti ka dalë në skarpatin e rrugës duke bërë saltro. Për pasojë, ka humbur jetën Gjystina Durgaj, 57 vjeçe dhe është plagosur bashkëshorti i saj Gjergj Durgaj, 65 vjeç, i cili ishte nën drejtimin e mjetit.
“Nga hetimet paraprake dhe nga deklarimet e drejtuesit te mjetit, mësohet se drejtuesi i mjetit ka humbur kontrollin mbi mjetin dhe për pasojë mjeti është përplasur me sinjalistikën anësore, dhe ka dalë në skarpatin e rrugës. Në automjet udhëtonte edhe bashkëshortja e tij 57 vjeçe e cila ka dalë nga mjeti gjatë rrotullimit duke gjetur vdekjen e menjëhershme”, njoftoi policia.
Çifti mësohet se ka dy fëmijë të rritur. /BN/
