Vijojnë hetimet për të zbuluar shkaqet e aksidentit të helikopterit nga rrëzimi i të cilit humbën jetën Kobe Bryant, vajza e tij 13-vjeçare, Gianna, dhe 7 persona të tjerë. Hetuesit kanë bërë të ditur se kanë në dorë komunikimet e fundit të pilotit të helikopterit, i cili po merrte kuotë për të shmangur shtresën e dendur të mjegullës.
Piloti kishte kërkuar një autorizim të veçantë për të fluturuar në mjegullën e dendur pak minuta para përplasjes dhe ishte në lartësinë 427 metra mbi nivelin e detit. Më pas, u kishte kërkuar kontrollorëve të trafikut ajror t’i ofronin një këshillues për të vijuar fluturimin, por kishte marrë paralajmërimin që helikopteri po fluturonte shumë ulët.
Rreth 4 minuta më vonë, piloti kishte njoftuar se po ngjitej për të evituar shtresën e mjegullës dhe kur është pyetur se çfarë kishte ndërmend të bënte, nuk kishte kthyer më përgjigje. Të dhënat e radarit tregojnë se helikopteri ishte ngjitur në kuotën 701 metra e më pas kishte rënë nga e majta.
Ndërkohë vijojnë iniciativat në nderim të legjendës së NBA-së. Më shumë se 500 mijë persona kanë firmosur një peticion për t’i kërkuar NBA-së që të vendosë imazhin e “Black Mambas” në logon e kompeticionit.
Logoja aktuale, e dizenjuar nga Alan Siegel dhe e pandryshuar që kur u krijua në vitin 1971, paraqet siluetën e një ish-lojtari të madh të Lakers, 81-vjeçarit Jerry West.
