Mëngjesin e 26 janarit, legjenda e basketbollit Kobi Brajant humbi jetën në një aksident me helikopter, ku në bord ishin edhe vajza e tij dhe 7 persona të tjerë nga bota e sportit. Ish basketbollisti Gazmend Caci në emisionin “Procesit Sportiv” zbuloi se Kobi në maj të këtij viti do të vinte në Shqipëri për një aktivitet.
Ish-lojtari i të kuqve nuk i kursen superlativat për Brayant dhe zbulon se ka një vit që ai dhe bashkëpunëtorët e tij ishin në bisedime për të sjellë në Shqipëri legjendën e “La Lakers”.
“Kobe Brayant është një nga tre basketbollistët më të mirë që ka nxjerrë Amerika në realizimin e pikëve. Njëkohësisht Brayant ka qenë super njeri. Një fatkeqësi e madhe që mori edhe vajzën e tij 13-vjeçare, të cilën po e përgatiste për ta bërë një basketbolliste të madhe.
Është e vërtetë se kemi dashur ta sjellim këtu. Kemi mbi një vit që mendojmë sesi mund ta thërrisnim të madhin Brayant në Shqipëri sepse ai kishte një formulë të veten, ku udhëtonte në gjithë botën për të promovuar basketbollin. Ne menduam ta sjellim në atë në Shqipëri dhe prej një viti kemi pasur bisedime më stafin e tij. Pretendonim të mbushnim një nga pallatet e sportit në Tiranë, ku Brayant do luante me fëmijët”, u shpreh Çaçi për RTSH Sport.
