Harlem Desir, përfaqësues i OSBE-së për Lirinë e Mediave, ndihmoi Kryeministrin Edi Rama që të kalonte në Kuvend një draft të ashtëquajtur “paketa anti-shpifje” edhe pse pati kundërshti nga Komisioni Europian, organizmat ndërkombëtare që mbrojnë lirinë e mediave apo organizatat vendore të gazetarëve.
Desir mori rolin e një “gomoneje” shpëtimi në rastin në fjalë, duke mbajtur qëndrime krejt të kundërta për të njëjtën çështje në rastin e Shqipërisë dhe Maqedonisë së Veriut. Në vendin fqinj ai mbështeti kërkesën e organizatave të gazetarëve lidhur me një vetërregullim të mediave, ndërsa në rastin e Shqipërisë pranoi propozimin që kjo të bëhej përmes një ligji qeveritar dhe dy institucioneve të varura plotësisht nga mazhoranca.
Harlem Desir, politikan i të majtës franceze, kulmin e karrierës së tij politike në Francë e pati kur u emërua sekretar i parë i PS-së.
Por emërimi i tij shkaktoi reagime të shumta në kohën kur Franca drejtohej nga Presidenti Francois Hollande. Ky i fundit kishte premtuar se nuk do të rrethohej nga njerëz të dënuar nga drejtësia.
Gazeta Figaro shkruante në 2012 se Harlem Desir ishte dënuar me 18 muaj burg, me kusht, dhe 30 mijë franga gjobë.
Mes viteve 1986 e 1987, kur Harlem Desir ishte president i shoqatës SOS Racisme, merrte 10,500 franga në muaj nga një shoqatë tjetër jo qeveritare, nga Shoqata Rajonale për Trajnimin dhe Edukimin e Mërgimtarëve, me qendër në Lille.
Për shkak të kryerjes së këtij aktiviteti të padeklaruar, Harlem Desir u dënua më 17 dhjetor 1998 me 18 muaj burgim dhe 30,000 franga gjobë për fshehje të abuzimit me pronën shoqërore.
