Pas tërmetit tragjik të 26 nëntorit, bashkia e Librazhdit shprehu solidarizimin me familjet e prekura, duke bërë me dije se shpenzimet për zbukurimin e qytetit për festat e Vitit të Ri do të shkonin për t’u ardhur në ndihmë atyre. Të paktën kështu ishte dhe njoftimi i bashkisë Librazhd:
“Kryetari i Bashkisë Librazhd Kastriot Gurra vendos anullimin e procedurës së prokurimit me objekt “Dekori i qytetit” për festat e fundvitit me, me numër Reference 45004-11-26-2019, e publikuar në Agjencinë e Prokurimit Publik, e zhvilluar në datë 27.11.2019. I gjithë fondi i parashikuar për dekorin e qytetit do të shkojë në ndihmë të familjeve të prekura nga tërmeti.”
Por, dje qytetarët e Librazhdit u befasuan kur u ndezën dritat në qytet dhe të shumtë ishin ata që pyesnin se nga e morën fondin. Librazhdi News u interesua pranë bashkisë Librazhd, por ata nuk u përgjigjën.
Sot bashkia doli sërish me një njoftim në Facebook për të sqaruar, por justifikimi është qesharak. Ajo shprehet se këtë vit kishte menduar të zbukuronte edhe lagjet e qytetit, por kjo nuk ndodhi se ato fonde shkuan për të prekurit nga tërmeti. Por duhet kujtuar se kjo gjë nuk ishte bërë me dije më parë dhe të bën të dyshosh se mashtron pasi Librazhdi është një qytet i vogël sa duket si një lagje i gjithi. Ndoshta kryebashkiaku Kastriot Gurra mendonte në mendjen e tij se drejtonte një metropol që ka në “gjirin” e tij dhe të madhin Taulant Balla.
“Sivjet kishim menduar të zbukuronim edhe lagjet e tjera të qytetit,jo vetëm qendrën. Por fatkeqësia e 26 Nentorit nuk mund të mos na bënte solidar ndaj dhimbjes dhe situates së tyre të veshtire,prandaj pjesen me te madhe te fondit per zbukurimin e qytetit e derguam atje.”
