Procesi mësimor do të rinisë sot edhe në zonat e goditura nga tërmeti i 26 nëntorit.
Me urdhër të ministres së Arsimit, nxënësit në Tiranë, Durrës, Vorë dhe Kurbin sot kanë nisur procesin mësimor, ndërsa në shkollat e cilësuara si të dëmtuara ka një zhvendosje të nxënësve.
Të dëmtuara në kryeqytet janë tetë shkolla. Akt-ekspertiza thotë se kthimi i nxënësve në ato mjedise përbën rrezik.
Në tabelën më poshtë gjeni emrat e objekteve arsimore me probleme, bashkë me zgjidhjen e përkohshme që kanë gjetur ekspertët e Ministrisë së Arsimit për nxënësit, të cilët janë adresuar pranë shkollave më të afërta.
Për shembull, 1440 nxënësit e gjimnazit “Sami Frashëri”, do të shpërngulen te “Qemal Stafa” dhe “Sinan Tafaj”. Kujtojmë që kjo shkollë është rikonstruktuar vetëm një vit më parë. Këto janë vetëm të dhënat paraprake, pas shtyrjes disa herë të mësimit nga ana e Ministrisë së Arsimit.
Të prekur nga ndryshimet e fundit figurojnë në total 1572 nxënës dhe 123 mësues, të cilat do të transferohen në “shkollat pritëse” me një rreze jo më të gjatë se 5 kilometra nga shkolla aktuale.
Ministria e Arsimit thuhet se po punon për gjetjen e zgjidhjes përfundimtare për nxënësit e mësuesit e prekur. Të gjitha objektet arsimore i janë nënshtruar ekspertizës së inxhinierëve të Institutit të Ndërtimit.
Në urdhrin për rifillimin e mësimit, ministrja e Arsimit, Besa Shahini, u ka kërkuar shkollave private të pajisen me akt-konstatimin e Institutit të Ndërtimit, si kusht për një proces normal mësimor.
Emri i shkollës Shkolla Pritëse
“Sami Frashëri” “Qemal Stafa” dhe “Sinan Tafaj”
“16 Shtatori”, Pezë Godinë e gjetur
Kopshti Tufinë “Pal Engjëlli”
Shkolla Pajun Ambient me qira
Pezë e Vogël “Seit Brahja”
“Lasgush Poradeci” “Myslym Keta”
“Murat Toptani” “26 Nëntori”
“Musine Kokalari” “Betim Muço”
