Të paktën shtatë njerëz kanë vdekur në një shpërthim gazi në një bllok banesash në Sllovakinë lindore. Një person është ende i humbur, ndërsa zjarrfikësit vazhdojnë të kërkojnë në ndërtesën në qytetin e Presovit.
Shpërthimi ndodhi në ndërtesën 12-katëshe. Pothuajse gjysma e ndërtesës ishte e përfshirë në flakë dhe tre katet e larta u shkatërruan.
Zyrtarët thanë se 40 persona ishin lënduar.
Zjarri u shua të shtunën në mëngjes, pasi më shumë se 100 zjarrfikës punuan gjatë natës për ta sjellë atë nën kontroll.
Komandanti i forcave zjarrfikëse, Jan Golias tha se “zjarrfikësit nuk ishin dakord me ndryshimet e ndërtimit të bëra në vitin 2017. Disa rregullore u shkelën. Kjo mund të ketë shkaktuar rrëzimin e shkallëve, ku ne nuk mund të evakuonim banorët”.
Banorët në ndërtesat aty pranë u evakuan dhe qëndruan nëpër shkolla.
