Një i ri është vënë në pranga nga Policia e Lezhës, pasi akuzohet se ka hedhur granatë te banesa e vjehrrit. Granata, fatmirësisht, nuk ka shpërthyer.
“Specialistët për Hetimin e Krimit në Komisariatin e Policisë Lezhë, duke përdorur dhe metodat proaktive, kanë identifikuar dhe arrestuar shtetasin P.D. vjeç 28, banues në Mirditë. Ky shtetas dyshohet se mbrëmjen e kaluar, për motive të dobëta, ka hedhur në oborrin e banesës së vjehrrit të tij, shtetasit Z.D. banues në fshatin Pllanë në Lezhë një granatë ofensive të cilës i kishte hequr siguresën, por nuk ka shpërthyer”, njoftoi policia.
Në vendngjarje, kanë shkuar ekspertët xhenier të Reneas, të cilët kanë bërë shpërthimin e kontrolluar të granatës.
Shtetasi P.D, prej disa kohësh kishte mosmarrëveshje me bashkëshorten dhe ushtronte dhunë fizike ndaj saj dhe për këtë bashkëshortja e tij ishte e pajisur me urdhër mbrojte, sqaruan të njëjtat burime.
Materialet procedurale, nga policia, u referuan në Prokurorinë e Rrethit Gjyqësor Lezhë për veprat penale në ngarkim të shtetasit P.D. “Vrasje me dashje e mbetur ne tentative” “Mbajtje pa leje dhe prodhim i armëve shpërthyese e municionit”.
