Lautaro Martinez ka dhënë një intervistë për rrjetin italian “Sky Sport 24”, ku ka folur për rritjen e tij si lojtar si dhe duke qetësuar tifozët dhe klubin e Interit, ku ka deklaruar që nuk mendon aspak largimin.
Së fundmi për sulmuesin argjentinas interesim serioz ka pasur nga dy skuadra të mëdha siç janë Manchester City dhe Barcelona, të cilët e shohin atë si pasues respektivisht të Sergio Aguero dhe Luis Suarez.
“Për mua, Interi është shtëpia ime. Kam shpenzuar shumicën e kohës këtu dhe e vërteta është që për mua ka shumë rëndësi. Njerëzit kanë treguar përzemërsi karshi meje që nga dita e parë u bëra pjesë e klubit dhe kjo është thelbësore për mua si lojtar por edhe si person, kështu që dua të vazhdoj të punoj këtu dhe të tregoj me përulësi se ja vlej të vesh këtë bluzë”.
“Qëllimi im është të bëj fansat dhe mbi të gjitha familjen time të lumtur. Ata janë të lumtur me mënyrën se si po shkojnë gjërat dhe unë jam i lumtur me atë që po arrij të bëj në fushën e lojës”.
Ndërsa në lidhje me sezonin spektakolar që po zhvillon ai deklaron:
“Shumë bashkëpatriotë kanë bërë historinë me këtë klub. Ata kanë arritur shumë gjëra dhe kjo është një përgjegjësi e madhe për mua që ta vazhdoj këtë traditë. Akoma duhet të punoj shumë dhe të përmirësohem. Thjesht jam i kënaqur që puna e fortë po më shpërblehet”.
