Ish-trajneri i kuqezinjve, Gianni De Biasi nuk e ka harruar Shqipërinë pasi në këto ditë të vështira pas tërmetit të 26 nëntorit, ka vendosur të japë kontributin e tij. Nëpërmjet një video-mesazhi të postuar në Facebook, De Biasi ka ftuar miqtë e tij italianë në grumbullimin e fondeve për të prekurit nga tërmeti.
“Përshëndetje të gjithëve! Miqtë e mi të “Bici E Solidarieta’ Carovigno” organizojnë të shtunën, më 14 dhjetor, një takim bamirësie në favor të njerëzve të goditur nga tërmeti në Shqipëri. Ju ftoj të merrni pjesë sa më shumë, për të dhënë edhe ne kontributin tonë. Edhe një herë faleminderit dhe forca Shqipëri!”, ka thënë ish-trajneri.
