Futbollisti venezuelian, Aristoteles Romero, i cili luan si mesfushor për ekipin e Partizanit, ka bërë bujë jo për përformancat e tij në fushën e lojës, por jashtë saj.
Mesfushori i Partizanit është kthyer në një makth për banorët e pallatit ku ai jeton, pasi festat e organizuara prej tij janë të zhurmshme dhe muzika e lartë nuk ndalet deri në orët e para të mëngjeseve.
“Panorama Sport”, mëson se banorët janë ankuar për sjelljen e lojtarit jo vetëm tek administratori i pallatit, por edhe në polici. Romero sa herë është ballafaquar me administratorin apo policinë, mësohet se ka kërkuar falje dhe u ka premtuar se nuk do ta përsërisë më, por ai sërish ka vazhduar.
Shpeshherë banorët e nervozuar kanë trokitur në derën e shtëpisë së lojtarit, i cili nuk i lë të flenë, por nga zhurmat e larta ai nuk i dëgjon. Në një rast, kur ka pasur ankesë nga banorët në mesditë, policia ka shkuar te shtëpia e venezuelianit. Justifikimi i lojtarit ndaj uniformave blu ka qenë qesharak: “Po pastroja shtëpinë dhe po dëgjoja muzikë, por ngaqë kisha lënë hapur dritaret është dëgjuar muzika”.
