Me një mesazh që mban datën 26 Nëntor, Fethullah Gylen shpreh ngushëllimet e tij për tërmetin që goditi Shqipërinë.
Në mesazhin e tij Gylen shpreh ngushëllimet për të gjithë shqiptarët që humbën njerëz në këtë tërmet katastrofal, ndërsa ju bën thirrje të gjithëve që të solidarizohen me vendin tonë dhe të na ndihmojnë.
“Me hidhërim të thellë mësova për tërmetin që ka goditur Shqipërinë, si pasojë e të cilit kanë humbur jetën dhjetëra njerëz dhe qindra të tjerë kanë mbetur të plagosur. U shpreh ngushëllimet e mia më të thella mbarë popullit shqiptar, veçanërisht atyre që kanë humbur njerëzit e tyre më të dashur gjatë tërmetit. I lutem Zotit, që t’u japë forcë skuadrave të kërkimit dhe të shpëtimit, që janë duke bërë çdo përpjekje për të shpëtuar njerëzit e mbetur nën rrënoja. Gjithashtu, i lutem Atij që t’u falë shërim sa më të shpejtë atyre që kanë mbetur të plagosur. U bëj thirrje dhe i nxit të gjithë që t’u vijnë në ndihmë njerëzve të prekur nga tërmeti me çdo mundësi që kanë, që Shqipëria të kapërcejë e të marrë veten nga kjo ngjarje tragjike”- e mbyll mesazhin e tij Mendimtari Gylen.
