Tërmeti katastrofik që goditi Shqipërinë mëngjesin e 26 nëntorit, ka shkaktuar ngritjen e tokës me rreth 10 centimetra afër qytetit të Durrësit.
Fakti i pazakontë bëhet i ditur nga agjencia e njohur italiane “Ansa”, sipas së cilës këtë e tregon sateliti Sentinel-1 i programit europian të Agjencisë Europiane të Hapësirës (ESA), i cili ka analizuar të dhënat.
Harta e deformimit të tokës, e marrë në bazë të të dhënave nga satelitët europianë Sentinel, tregon deformimin e tokës, siç ka ndodhur në tërmetet e vitit 2009 në L’Aquila, 2012 në Emilia Romagna dhe 2013 në Lunigiana.
Deformimi u mat nga platforma në internet Geohazard-tep, e zhvilluar nga ESA, duke përdorur imazhet e marra nga satelitët Sentinel-1 nga i njëjti vend, para dhe pas tërmetit.
Lidhur me këtë fenomen, sizmologu Llambro Duni, në një prononcim për News 24 shprehet se kjo që ka ndodhur është e logjikshme.
“Kemi të bejme me një thyerje tektonike, ka një plan të pjerrët dhe sipas mekanizmit që ka gjeneruar tërmetin, e ka ngritur pjesën e siperfaqes. Ka lëvizur në drejtimin lart dhe është e arsyeshme pas një termeti kaq të fortë”, shpjegon ai.
Ndërkohë sizmiologu i ka drejtuar një apel edhe qytetarëve, banesat e të cilëve janë dëmtuar nga tërmeti i së martës.
“Është e dosmosdoshme që njerëzit të mos marrin aventura dhe të hyjnë në struktura që janë të dëmtuara. Ndërtesat duhet të vleresohen më parë, të inspektohen për të parë se në çfarë shkalle është dëmtimi. Nëse d♪7mtimi ♪7shtë në shkallë të lartë, atëherë njerëzit nuk kanë pse shkojnë dhe hyjnë në to, por të ndjekin këshillat për t’u strehuar diku tjetër”, tha Duni.
