Mos më nxirrni, dua të vdes në krahët e vajzës sime.
Këto janë fjalët e fundit që Diena Karanxha, mësohet t’u ketë thënë ekipeve të shpëtimit, teksa përpiqeshin ta nxirrnin nga rrënojat.
Mediat raportojnë se Diena ka komunikuar me ekipet e shpëtimit, pavarësisht se ka qenë në një gjendje të rëndë shëndetësore.
Historia e piktores, që bashkë me vajzën e mitur 8 vjeç, humbi jetën nga tërmeti i 26 nëntorit, vijon të trondisë mediat shqiptare dhe më gjerë.
Nënë e bijë, Diena dhe Esiela, qëndruan të përqafuara për 12 orë nën rrënoja, ndërsa ekipet e shpëtimit përpiqeshin t’i nxirrnin nga rrënojat.
30-vjeçarja dhe vajza e saj, jetonin në Durrës, ndërsa Diena kishte humbur bashkëshortin pak kohë më parë.
Ajo jetonte me familjen e prindërve dhe nga tragjedia e 26 nëntorit humbi jetën edhe nëna e Dienës, Roza Meçaj.
Nga tragjedia e rëndë e kësaj familjeje ka mundur të shpëtojë babai i Dienës, i cili ka identifikuar edhe trupin e pajetë të bashkëshortes së tij.
E para që u nxorr e pajetë nga rrënojat ishte Esiela, 8-vjeçe, dhe disa orë më pas ekipet e shpëtimit arritën të nxjerrin të gjallë, nënën e saj, Diena, por ajo nuk mundi të mbijetojë për shkak të hemoragjisë.
