Një ditë më parë, Balfin Group, e biznesmenit Samir Mane, njoftoi shpërndarjen e disa batanijve, nuk dihet se sa, për qytetarët e prekur nga tërmeti, me qëllim përballimin e natës, duke qenë se qindra e qindra persona do të kalonin natën jashtë.
Kompania që shpërndau batanije dhe premtoi se do të kishte të tjera ndihma për banorët e prekur nga tërmeti, ende nuk ka deklaruar si shumë prej kompanive të tjera të mëdha në vend, mbi ndonjë fond që mund të akordohej për familjet e prekura.
Ndërkohë, një tjetër kompani e Manes, Neptun-i, e përqëndruar kryesisht te elektroshtëpiaket, dje njoftonte solidarizimin me familjet e prekura nga tërmeti, ndërsa shprehte ngushëllime për familjet që kishin humbur të afërmit e tyre në këtë tragjedi.
Ndërkohë, në një postim tjetër, Neptun njoftonte se pikën e saj në Durrës, do e mbante mbyllur për t’u bashkuar me dhimbjen e qytetarëve.
Deri këtu dukej një solidarizim, sikundër ndodhi me mijëra e mijëra qytetarë apo biznese që në një mënyrë apo një tjetër, u gjendën pranë familjeve të prekura nga tërmeti.
Por në njoftimin e Neptun, vërtet thuhet se dyqani do të mbyllej, por shërbimi do të vijonte.
Madje qytetarët udhëzoheshin se nëse do të kërkonin të blinin produktet e kompanisë mund të telefononin dhe transportin e kishin falas.
Pra biznesi do të vijonte, duke përdorur shërbimin online.
Kaq mjafton për të treguar se mbyllja e një pike apo disa pikave në qytetin e Durrësit nga kompania në fjalë, nuk kishte lidhje me solidarizimin me qytetarët, që u prekën më shumë nga tërmeti, qoftë në aspektin psikologjik, ashtu edhe në rastet më të rënda, duke humbur jetë njerëzore apo mbetur pa shtëpi.
Ndoshta vendimi për të mbajtur mbyllur dyqanin, por jo shërbimin, ka ardhur nga frika se lëkundjet do të vijonin dhe stafi do të përfshihej nga paniku, sikundër ndodh me të gjithë.
Dhe këtu nis cinizmi, kur gjoja në emër të solidaritetit dyqani mbyllet, por shitja vijon…
