Kryeministri Edi Rama duket se nuk e mendon të shpallë gjendjen e emergjencës, pavarësisht se e pranoi se gjendja në vend është e rëndë.
Rama bëri një vizitë në spitalin e Traumës në kryeqytet ku mbajti një prononcim për gazetarët. Shefi i ekzekutivit u pyet nëse do të shpallë gjendjen e jashtëzakonshme.
“Është e çuditshme që e dëgjoj pyetjen nga mëngjesi në darke se si kush ua ka mësuar që është pyetja që ka kuptim. Akti formal i gjendjes së jashtëzakonshme nuk është se sjell më shumë se ç’ka sjellë deri më sot më shumë intensitet dhe solidaritet, s’do ndryshojë asgjë dhe nesër është dita për të menduar për të gjitha përfshirë dhe këtë që thoni ju”, tha Rama.
Mbi 20 persona kanë humbur jetën dhe rreth 600 të tjerë janë plagosur nga tërmeti 6.4 ballë që goditi vendin rreth orës 4 të mëngjesit të sotëm.
Nëse qeveria e shpall gjendjen e emergjencës, ligji e imponon një dëmshpërblim në masën 100 përqind të çdo dëmi që prek popullatën. Nga opozita është kërkuar që qeveria të shpallë gjendjen e jashtëzakonshme.
Gjatë deklaratës së tij, Rama ka thumbuar edhe Presidentin Ilir Meta, pas kritikave të kreut të shtetit ndaj ambasadave në vend. “Ambasadat, që në ditët e fundit i kemi në një shënjestër që na turpëruar të gjithëve, sot që në mëngjes herët në emër të SHBA dhe BE-së na kanë shprehur gatishmërinë e tyre”, tha Rama.
