Partizani përballet ditën e nesërme me Laçin, sfidë që do të mbyllë raundin e 13-të të Kategorisë Superiore.
Një sfidë e vështirë kjo për kryeqytetasit, pasi Laçi është një skuadër që po kalon një moment të mirë në kampionat, teksa ka marrë pikë maksimale në katër ndeshjet e fundit. Por kjo gjë nuk e shqetëson trajnerin Partizanit, Franco Lerda, ku në intervistën e tij theksoi që beson shumë te lojtarët e rinj dhe që do të arrijnë fitoren.
“Është e vërtetë. Laçi ka arritur 4 fitore në 4 ndeshjet e fundit, ka realizuar 12 gola, ndaj është një skuadër që gëzon formë të mirë sportive. Por edhe ne e kemi përgatitur mirë ekipin tonë. Kemi bërë një punë të mirë në stërvitje. Edhe lojtarët që ishin angazhuar me kombëtaren janë rikthyer dhe fatmirësisht nuk kanë pësuar dëmtime. Lojtarët e mi gëzojnë formë të mirë fizike dhe psikologjike. Kemi respekt për kundërshtarin, por ne jemi Partizani”.
“E kam thënë gjithnjë. Jo vetëm këtu te Partizani, por kudo ku kam trajnuar, në mentalitetin tim, çdo ndeshje duhet fituar. Prandaj i kam thënë edhe futbollistëve që drejtoj, se në fushë hyjmë për të fituar, jo vetëm këtë, por të gjitha. Pastaj është fusha ajo që tregon se si do të jetë fati i takimit”. – tha Lerda.
Ndeshja luhet ditën e nesërme në “Elbasan Arena”, ora 18:00.
