Pas fitores së Juventusit me përmbysje ndaj Atalantës 1-3, Interi u kundërpërgjigj, ku fituan me rezultatin e thellë 0-3.
Sfida nisi më e mirë për vendasit, që morën kontrollin e lojës dhe hodhën disa krosime të rrezikshme në zonën e Handanovic.
Megjithatë pas 12 minutash lojë, Vecino fitoi një dyluftim ajror në mesin e fushës dhe pa dashje dha një asist për Lautaro Martinez, që fitoi duelin e shpejtësisë me mbrojtësit torinezë dhe mposhti edhe portierin Sirigu, për të kaluar zikaltrit në avantazh.
Torino u përpoq të reagojë, por pa saktësinë e duhur, ndërsa në minutën e 32-të ishte sërish Interi që shënoi golin e dytë me anë të holandezit Stefan De Vrij, pas një skeme perfekte të realizuar gjatë ekzekutimit të një këndoreje.
Torino pati mundësi të rihapë takimin në 45-minutëshin e parë, por mundësia më e mirë erdhi në këmbët e Silvestrt, që gjuajti drejt portës, aty ku Handanovic bëri një nga pritjet më spektakolare të mbrëmjes.
Në pjesën e dytë ishte Romelu Lukaku ai që shënoi , duke gjetur golin e tretë të mbrëmjes për Interin dhe të dhjetin personal me fanellën zikaltër në 13 javët e para të kampionatit.
Me këtë fitore Interi, gjendet në vendin e dytë, me vetëm një pikë më pak se kryesuesit e Juventus.
