Bayern Munich ka marrë një tjetër fitore bindëse në javën e 12-të të Bundesliga-s. Pasi mundi 4-0 rivalët e Dortmund në javën paraardhëse, bavarezët kanë mundur me të njëjtin rezultat Dusseldorf në transfertë.
Katër gola, katër autorë të ndryshëm. Pavard ka zhbllokuar takimin në minutën e 11-të, ndërsa Tolisso ka dyfishuar në të 27-ën. Goli i tretë i miqve është shënuar nga Gnabry në të 34-ën, ndërsa Coutinho ka kompletuar “pokerin” në të 70-ën.
Kjo fitore ka ndihmuar bavarezët që të ngjiten në vendin e dytë dhe të shkojnë një pikë larg kreut, duke parë Borussia Monchengladbach, ekipi që kryeson kampionatin, është mundur 2-0 në fushën e Union Berlin.
Lajme të këqija edhe për Werder-in e Milot Rashicës, që është mundur 2-1 në shtëpi nga Scalke. Wolfsburg ka mundur 2-0 Frankfurt-in në transfertë, ndërsa Leverkusen-Freiburg është mbyllur 1-1.
