Përditësuar/ Presidenti i Republikës Ilir Meta ka shpallur vakancën për vendin e mbetur bosh në Gjykatën Kushtetuese, pas shkarkimit një ditë më parë të anëtarit të kësaj Gjykate Besnik Muçi, nga Kolegji i Posaçëm i Apelimit.
***
U shkarkua nga KPA/ Kushtetuesja ‘fshin’ Besnik Muçin
Besnik Muçi nuk është më anëtar i Gjykatës Kushtetuese. Një ditë pas shkarkimit nga Kolegji i Posaçëm i Apelimit , Gjykata Kushtetuese e ka hequr emrin e tij nga përbërja e anëtarëve.
Këtë të enjte, Besnik Muçi u shkarkua nga detyra nga KPA. Ditësn e sotme, përmes një letre drejtuar Kushtetueses, Muçi shpjegoi arsyet pse sipas tij vendimi i KPA për shkarkimin nga detyra nuk është i vlefshëm. Në letër megjithatë, kërkoi vendimin e Kushtetueses, për të vijuar ose jo detyrën si anëtar i kësaj gjykate.
“Pavarësisht sa më sipër, me qëllim për të ruajtur integritetin tim dhe të Gjykatës Kushtetuese të Republikës së Shqipërisë, lidhur me çështjen administrative të ushtrimit të detyrës, jam në pritje të njoftimit të vendimit të Gjykatës Kushtetuese për deklarimin ose jo të mbarimit të mandatit tim si Gjyqtar i Gjykatës Kushtetuese në përmbushje të detyrimeve të nenit 127 të Kushtetutës dhe nenit 9 të ligjit Nr. 8577, datë 10.02.2000 në një afat sa më të shpejtë të mundur”, thuhet në letër.
Ndërkohë, Presidenti Meta “është në pritje të njoftimit nga Gjykata Kushtetuese për të rishpallur menjëherë këtë vakancë për aplikim”, bënë me dije burime zyrtare nga Presidenca.
Ndërkaq, Gjykata Kushtetuese vijon të mbetet jo funksionale. Pas shkarkimit të Muçit, Kushtetuesja mbetet me 4 anëtarë, nga 9 që duhet të ketë në total.
