Nga Boldnews.al
Pasi qëndroi rreth 2 muaj në pasivitet të plotë, tashmë Prokuroria ka nisur “revanshin” ndaj ish-kryetarit të emëruar të Bashkisë së Vorës, Agim Kajmaku, i dyshuar për kryerjen e veprave penale të “falsifikimit të formularit” të dekriminalizimit, si edhe për ‘shpërdorim detyre”.
Prokurori i çështjes, Kolë Hysenaj, kërkon me ngulm prangosjen e Kajmakut pas caktimit të masës së sigurisë “arrest me burg” nga gjykata, pavarësisht se mungesa e tij nuk i pengon hetimin.
Në një shkresë të publikuar së fundmi, prokurori Hysenaj kërkon nga Dhoma e Noterisë që të njoftojë të gjithë noterët e Shqipërisë për të raportuar në institucionin e Akuzës, në rast se Agim Kajmaku paraqet para ndonjërit prej tyre.
Në këtë shkresë, prokurori Kolë Hysenaj kërcënon noterët që do të mbajnë përgjegjësi penale, në rast se ata nuk raportojnë mbi “vizitat” e mundshme të Agim Kajmakut në zyrat e tyre.
Ky “kërcënim” nuk ka asnjë bazë ligjore dhe, për më tepër, bie në kundërshtim me ligjin “Për Noterinë”. Por, megjithëse prokurori Hysenaj, për shkak të përvojës së tij në sistemit e drejtësisë, duhet të jetë në dijeni se nuk është vepër penale mos-raportimi nga noterët, ai gjithësesi ka hartuar shkresën, e cila duket më shumë si “vullnet politik” se sa veprim procedurial.
“Boldnews.al” kreu verifikimet në Kodin Penal, nga të cilat nuk rezultoi asnjë nen, ku të mbështetet “kërcënimi” i prokurorit Hysenaj për noterët.
Prokurori Hysenaj nuk përmend në shkresën e tij konkretisht se në bazë të cilit nen mund të mbajnë përgjegjësi noterët. Gjithësesi, duket se ai i referohet nenit 300, që parashikon “moskallëzimin e krimit”.
Doktrina penale njeh si “moskallëzim krimi” rastet kur një person, noter ose kushdo tjetër, sheh një krim në kryerje e sipër, e kupton që ajo që po ndodh është krim dhe nuk e raporton pranë organeve ligjzbatuese.
Në rastin konkret, nëse Agim Kajmaku shkon në zyrën e një noteri, kjo nuk përbën “krim”. Për më tepër, jo noteri, por as vetë Prokuroria dhe prokurori i çështjes nuk kanë arritur në konkluzionin nëse Agim Kajmaku ka kryer apo jo vepër penale.
Përsa kohë që ish-kryebashkiaku i Vorës është nën hetim, ai prezumohet i pafajshëm, megjithëse faktet që kanë dalë kundër tij janë “kokëfortë”.
Nga ana tjetër, prokurori Kolë Hysenaj duket se nuk ka njohuri ose nuk ka vlerësuar t’i referohet ligjit të vitit 2018 “Për Noterinë”.
Në nenin 73 të tij, parashikohet se: “Noteri është i detyruar të ruajë konfidencialitetin. Ky detyrim zbatohet për çdo të dhënë për të cilën ai merr dijeni në zbatimin e detyrës së tij”.
Detajet ligjore, si ato të Kodit Penal, edhe ato të Ligjit për Noterinë, e shndërrojnë në qesharake kërkesën e prokurorit Kolë Hysenaj drejtuar Dhomën Kombëtare të Noterisë.
Por, ai, mesa duket, e ka lënë mënjanë sqimën profesionale, duke dëshmuar se do të bëj gjithçka për arrestimin e Agim Kajmakut, ish-zyrtarit që “guxoi” të emëronte si zëvendësues të tij një person që nuk kishte “bekimin” e drejtuesve të Partisë Socialiste.
