Kreu demokrat Lulzim Basha në kuadër të turit “Rrugëtim për Shqipërinë” ishte gjatë fundjavës në Sarandë, ku zhvilloi një bashkëbisedim me biznesin.
Gjatë takimit, kreu demokrat ndoshta është befasuar kur disa nga të pranishmit, i kanë pohuar se janë socialistë, por qeveria i ka lënë jashtë vëmendjes, madje masat e saj kundër biznesit janë shtrënguese.
Por ajo që nuk është dhënë në media ishte një takim i organizuar në Nivicë-Bubar, ku Basha shkoi pas kërkesës së disa qytetarëve që i kanë pohuar se janë socialistë.
Detajet e këtij takimi janë zbardhur nga Agron Mema, i cili në një postim në rrjet, shkruan se pyetjeve të socialistëve nivicjotë se ç’do bëhet me Gjirin e Kakomesë, kreu demokrat Basha u është përgjigjur se me ardhjen në pushtet të demokratve pikë së pari do të shfuqizohet ligji i “Korporatës së Investimeve”, i cili e shpall kryeministrin zot të trojeve të Bregdetit, shpronëson këdo dhe kur do dhe i jep tenderin atij që preferon.
Duket se ky takim i Bashës në Nivicë, pikërisht me socialistët, ka dhënë rezultatin e parë, pikërisht ditën e shtunë, kur në procesin e zgjedhjeve të delegatëve për Kongresin e PS-së, nga Nivicë-Bubar pjesëmarrja pothuajse ishte zero.
