Policia Kufitare në bashkëpunim me forcat e misionit Frontex dhe Policinë Korçë, kanë arrestuar 4 persona në operacionin e koduar “Vishotica”, pasi u kapën duke transportuar disa shtetas të huaj.
Në prangat e policisë kanë rënë shtetasit: O.Z., 30 vjeç, banues në Tiranë, F.S., 39 vjeç, banues në Tiranë, I.T., 47 vjeç, banues në Korçë (i dënuar më parë për vepra penale në fushën e krimeve kundër personit dhe organizimit të lotarive të palejuara) dhe E.R., 49 vjeç, banues në Korçë.
Sipas njoftimit të autoriteteve, këta shtetas jane kapur nga strukturat e lartpërmendura, në rrugën Trestenik-Vishoticë, duke transportuar me mjetet tip “Volkswagen Touareg” dhe “Mercedes-Benz”, disa shtetas të huaj, të cilëve iu kishin premtuar kalimin dhe transportimin e tyre drejt vendeve të BE-së, kundrejt fitimit prej 200 euro secilit.
Nga ana e Policisë, po punohet për të vendosur përpara përgjegjësisë ligjore edhe persona të tjerë, të dyshuar si të implikuar në këtë ngjarje.
Materialet i kaluan Prokurorisë pranë Gjykatës së Shkallës së Parë Korçë për veprën penale “Ndihma për kalim të paligjshëm të kufijve, kryer në bashkëpunim”.
