Moderatori Mustafa Nano ka hedhur në treg kohët e fundit librin e tij të titulluar “Si e kam njohur”. I ftuar në emisionin “Historia ime”, Nano ka komentuar këtë botim, i cili ka ngjallur polemika që prej parathënies mjaft provokative dhe për të vijuar më pas me rrëfimin e njohjes së tij me 55 figura publike.
“Është një mënyrë për të folur për vendin, për Shqipërinë. Duke folur për personazhet që kanë dominuar skenën politike, kulturore, në përgjithësi skenat, ti në njëfarë mënyre ke folur për vendin.
Ka shumë mënyra për të folur për Shqipërinë dhe njëra prej tyre është edhe kjo. Për të trajtuar personazhet që kanë bërë kohën e mirë dhe kohën e keqe, shiun dhe diellin, që kanë krijuar dramë dhe kanë zgjidhur probleme, ndonjëherë.
Megjithëse kanë zgjidhur probleme në fakt, shpeshherë që kanë krijuar vetë, por gjithsesi kjo është Shqipëria”, është shprehur Nano.
Ndërsa komenton njohjen me kryeministrin Edi Rama, një prej personazheve të trajtuar në librin e tij, analisti shprehet se me Ramën nuk ka pasur marrëdhënie shumë të afërta, por thjesht kontakte të natyrës intelektuale.
Teksa shprehet se fillimisht ka qenë i inspiruar nga natyra e tij, analisti shton se tashmë kryeministri e ka humbur motivimin dhe është personi më i trishtuar në botë.
“Rama, ndër personazhet e librit, është njëri prej atyre që unë e njoh më mirë sepse kam pasur edhe kontakte personale.
Kontaktet e mia personale me Ramën kanë qenë kontaktet e mia më të mira me një politikan sepse kanë qenë të natyrës intelektuale.
Kemi shkëmbyer idera politike, nuk kam pasur marrëdhënie siç kanë shumë kolegë të mi me politikanët, që i kanë shumë të afërta.
Nuk i kam pasur asnjëherë të afërta, jemi takuar, kemi biseduar, kemi shkëmbyer ndonjë libër.
E këtij niveli, e këtij lloji ka qenë marrëdhënia.
Si politikan e kam ndjekur vazhdimisht, fillimisht më ka inspiruar me natyrën e vetë, me kurajon e vetë.
Por me kalimin e kohës, Rama i ka humbur motivimet e mira që ka pasur, nuk ka më motivime, është i zbrazët nga motivimet.
Por unë e shoh, ai është edhe i trishtuar, është kryeministri më i trishtuar në botë”.
